إعلاميين عار ضد الزمالك و جمهوره هو السند

هو أي حد سواء كان بيحب النادي أو ابن النادي بيجي ليه فجأة عليه وقت  بيبقي عاوز يكسب مشاهدات ويكسب جمهور من المنافس ويقول كلام مبيحصلش والبرامج تستضيفه ويقول ويكرر ف الكلام ويبقي بيتقال عليه " حيادي " مع أنه لو حكم عقله شوية كده وكلف نفسه وسمع الأصوات اللي بتتكلم عن المنافس وهما منه هيلاقي كلام بعيد عن الحق و الحقيقة وكل مبرراتهم أنهم اتربوا علي مبادئ النادي اللي هي مش مبادئ وقيم ولا حاجة بس المبادئ اللي اتربوا عليها أنهم ورا النادي سواء صح ولا غلط  !! 

ياريت بس اللي زملكاوية و محسوبين كبرامج مقدمينها زملكاوية يعرفوا أن أما يقول الغلط اللي شايفه ف الزمالك يقول برضه اللي زيه ف نادي او اندية تانية  !! 

اللي شايف نفسه حيادي ولازم يقول رأيه بحياد وموضوعية فيه زيه بالظبط ناس أهلاوية شايفين مصايب وساكتين عليها عشان مبادئ النادي بتقولهم متهاجموش النادي  !! 

مواقف إعلام العار :

فاكرين شوبير أما دخل تركي فبرنامجه وشحت ع الأهلي عشان تركي يدخل فلوس ويجيب لعيبة للنادي 🙄

مين زملكاوي يعرف يتكلم زي شوبير أو يعمل كده؟ 

اللي عمله شوبير مش صح و مفيش زملكاوي يتمني ده يحصل من حد زملكاوي لكن ع الأقل لو مش هتخدم النادي متسببش له ضرر أو هدم استقرار.. 

السنة اللي فاتت أما كان الزمالك متصدر وفارق عن الكل بنقاط كتير كان كلام الإعلام اللي بيذيع الماتشات والبرامج اللي محسوبة ع الاهلي ان الدوري ف الملعب والاهلي هيقدر وكان الاهلي يخسر وكان الاهلي خسران نهائي افريقيا من الترجي وكان فريق مهلهل فنيا وجماعيا وفرديا وفي الضياع من كل الجهات وبرضه الاعلام يقول الاهلي يقدر والاهلي يخسر في الدوري ويقولوا الاهلي يقدر والاهلي يخسر من الوصل ويطلع من كاس زايد ويقولوا الاهلي يقدر وواحدة واحدة بقي الاهلي الميت بيتحرك ويقولوا الاهلي يقدر واتظبطله ماتشاته والاعلام سكت وبقي يقدر اكتر واكتر وفعلا  رجع الأهلي وبقي قادر وخد الدوري بكلام زي هل ضاع الدوري من الزمالك والزمالك فارق بست نقاط !!! 

إعلام عارف بيعمل أيه نفسيًا في الزمالك وعارف بيعمل أيه نفسيًا للأهلي  !! 

كل ده ممكن تشوفه أنت وأنا بشكل انه مش مؤثر  و مش كبير طب ما الزمالك يكسب هو حد ماسكه!!  

 

كلامك صح الزمالك يكسب ويسكت اي حد بيتكلم طب ولعيبة الزمالك مش بشر بيتأثروا بكلام كل شوية هل الاهلي اما كسب النهارده ضيع الدوري من الزمالك  ؟؟ والأهلي يقدر وفيه مشكلة في الزمالك وكلام ان فيه مشاكل مع جروس وفيه مشكلة مع اللاعب فلان  !!! 

كلام كله هدفه ارفع معنويات هنا وضيع معنويات هنا!! 

الاعلام عارف كويس بيعمل ايه كل سنة واللي بيتعمل بيتكرر بالنص مبيتغرش.. 

حتي وبعد إنشاء قناة الزمالك اللي مفروض تبقي صوت الزمالك وتدافع عنه وتصحح أي حاجة بتتقال غلط عن النادي معملتش المطلوب ولا صوتها بقي عالي زي أصوات إعلام العار.. 

اللي نقدر نعمله احنا تغيير المفاهيم نبقي عارفين كويس مين بيعمل ايه وليه ومنتأثرش دايما بكلام الاعلام عشان منهاجمش لعيبتنا اللي ف ايام كتير كانوا ف الموعد  و كانوا رجالة.. 

ياريت بلاش نمشي ورا الإعلام اللي بيقطع ف لعيبتنا وفي نادينا وخلينا عارفين بس أن نادينا محتاجنا دايما في ضهره، أحنا السند و أحنا الداعم و أحنا القوة اللي بتسند النادي وسط ما كل اللي حواليه بينهشوا فيه 🇦🇹❤

عاش الزمالك.. عاش جمهوره في ضهره